സെക്സ് ; സ്ത്രീ, പുരുഷൻ 1. ഒട്ടുമിക്ക പുരുഷനും വളരെ opened ആയ സെക്ഷ്വൽ താൽപര്യമാണുള്ളത്. സ്പർശം കൊണ്ടും നോട്ടം കൊണ്ടും വരെ വൈകാരികമായി ഉദ്ദീപിക്കപ്പെടുന്ന തരത്തിൽ opened ആണ് മിക്ക പുരുഷന്മാരുടെയും എതിർലിംഗ താൽപര്യം. നേരെ മറിച്ച് ഒടുമിക്ക സ്ത്രീകളിലും എതിർലിംഗ താൽപര്യം അത്ര opened അല്ല. പലപ്പോഴും താരതമ്യം ചെയ്യാറുള്ളതു പോലെ സെക്സിൽ സ്ത്രീകൾ കടൽ പോലെയും പുരുഷൻ കര പോലെയുമാണ്. കടൽ പതുക്കെ ചൂടു പിടിച്ച് പതുക്കെ തണുക്കുന്ന പ്രാകൃതമാണ്. എന്നാൽ കരയാകട്ടെ പെട്ടെന്ന് ചൂടുപിടിച്ച് പെട്ടെന്ന് തണുക്കുകയും ചെയ്യും. 2. സ്ത്രീയുടെ കടൽ പ്രാകൃതം കാരണമാണ് ഫോർ പ്ലേ എന്ന ബാഹ്യ കേളികൾ പങ്കാളികൾ തമ്മിലുള്ള സെക്സിൽ വേണമെന്ന് പറയുന്നത്. ഫോർപ്ലേ കൂടാതെ ഒട്ടുമിക്ക സ്ത്രീകളും ലൈംഗികമായി ഉത്തേജിക്കപ്പെടാറില്ല. മാത്രമല്ല, ഫോർപ്ലേ കൊണ്ടു മാത്രം ഓർഗാസം അനുഭവിക്കാൻ സ്ത്രീകൾക്ക് കഴിയുകയും ചെയ്യും. ഫോർപ്ലേ കൂടാതെയുള്ള പെനീട്രേഷനിൽ സ്ത്രീകൾക്ക് ചിലപ്പോൾ ഓർഗാസം സംഭവിക്കാതിരിക്കുക വരെ ചെയ്യും എന്നതാണ് യാഥാർത്ഥ്യം. 3. എതിർലിംഗ താൽപര്യത്തിൽ പുരുഷനെ നയിക്കുന്നത് opened ആയ ലൈംഗിക വികാരമായതു കൊണ്ട് പ്രണയിക്കാനും പിന്നാലെ നടക്കാനുമുളള ത്വര പുരുഷനു കൂടുതലാണ്. എന്നാൽ സ്ത്രീകളിൽ ഈ opened വികാരം പ്രവർത്തിക്കാത്തതു കൊണ്ടു തന്നെ എതിർലിംഗക്കാരനോട് പെട്ടെന്ന് താൽപര്യം തോന്നണമെന്നേയില്ല, പ്രണയമുണ്ടായാൽ തന്നെ സെക്ഷ്വൽ ഇന്ററസ്റ്റ് ഉണ്ടാവണമെന്നില്ല. സൗന്ദര്യം ; സ്ത്രീ, പുരുഷൻ സൗന്ദര്യപ്രകടനത്തിലും സ്ത്രീകളും പുരുഷനും തമ്മിൽ വ്യത്യാസമുണ്ട്. 1. സ്ത്രീയെ സംബന്ധിച്ചിടത്തോളം മുഖത്തെ കൂടാതെ ശരീരം മൊത്തത്തിലും സൗന്ദര്യ പ്രദർശനത്തിൽ പങ്കു ചേരുന്നുണ്ട്. മുഖത്തെ പോലെ ശരീരത്തിന്റെ ഓരോ ഭാഗവും സൗന്ദര്യ പ്രകടനത്തിൽ ഭാഗമാവുന്നുണ്ട്. എന്നാൽ പുരുഷനെ സംബന്ധിച്ചിടത്തോളം മുഖത്തിനാണ് സൗന്ദര്യ പ്രകടനത്തിൽ പ്രധാന റോൾ. 2. സ്ത്രീകൾക്ക് മാറിടം മുതൽ തുടകൾ വരെ സൗന്ദര്യത്തിന്റെ ഭാഗമാണ്. അതുകൊണ്ടാണ് മാറിടഭാഗവും കാൽത്തുടകളും പ്രദർശിപ്പിക്കുന്ന രീതിയിലുള്ള വസ്ത്രാലങ്കാരങ്ങളും സ്ത്രീകളിൽ മോഡലായി വരുന്നത്. 3. സ്ത്രീകൾ സൗന്ദര്യം കൂടുതൽ പ്രദർശിപ്പിക്കും തോറും Opened ആയ എതിർലിംഗ താൽപര്യമുള്ള പുരുഷൻ കൂടുതലായി സ്ത്രീയിൽ ആകർഷണനാവുകയും കാമാതുരത വർദ്ധിക്കുകയും ചെയ്യുന്നു. എന്നാൽ സ്ത്രീക്കാകട്ടെ, സൗന്ദര്യം പ്രദർശിപ്പിക്കുന്നതിന് പിന്നിൽ പ്രത്യേകിച്ച് ഒരു ലൈംഗിക താൽപര്യവുമില്ലതാനും. ഇത് ഒരു പ്രതിസന്ധിയാണ്. സ്ത്രീയും പുരുഷനും തമ്മിലുള്ള വൈരുദ്ധ്യാത്മക എതിർലിംഗ താൽപര്യത്തിന്റെ പ്രതിസന്ധി. മനുഷ്യൻ ഈ പ്രതിസന്ധിയെ പണ്ടു മുതലേ അഭിമുഖീകരിക്കാൻ ശ്രമിച്ചിട്ടുണ്ട്. അങ്ങനെ അഭിമുഖീകരിച്ചതിന്റെ ഉൽപന്നങ്ങളാണ് ഇന്ന് നിലവിലുളള മതങ്ങളും മറ്റു ധാർമിക പ്രത്യയശാസ്ത്രങ്ങളും. എന്നാൽ ഇവയെല്ലാം സ്ത്രീയെ തളച്ചിട്ട് പുരുഷന്റെ കാമാതുരതയെ ശമിപ്പിക്കാനാണ് ശ്രമിച്ചത്. ഫലത്തിൽ ജനസംഖ്യയുടെ പകുതിഭാഗം വരുന്ന സ്ത്രീകൾ തുല്യതയില്ലാത്തവരായും സ്വാതന്ത്ര്യവും നീതിയും നിഷേധിക്കപ്പെട്ടരായും മാറി. ആധുനിക സമൂഹം സ്ത്രീ പുരുഷ ബന്ധത്തിന്റെ ഈ വൈരുദ്ധ്യാത്മകതയെ സമീപിക്കേണ്ടത് പഴയ മതഗ്രന്ധങ്ങളെ കൂട്ടു പിടിച്ചോ പാരമ്പര്യമായി കൈമാറി വരുന്ന ധാർമിക ആചാരങ്ങളെ പിൻപറ്റിയോ അല്ല. മറിച്ച്, ശാസ്ത്രീയമായി രൂപവൽക്കരിക്കപ്പെടുന്ന സെക്സ് എജ്യൂക്കേഷനും ജൻഡർ ന്യൂട്രലൽ ഫിലോസഫികളും കൊണ്ടായിരിക്കണം. ജെൻഡർ ന്യൂട്രൽ - ആധുനിക പാഠങ്ങൾ ; 1. സ്ത്രീ - പുരുഷൻ തമ്മിലുള്ള വൈരുദ്ധ്യാത്മക എതിർലിംഗ താൽപര്യത്തിന്റെ പ്രതിസന്ധിക്കുള്ള പരിഹാരമെന്നോണം മതങ്ങളും പാരമ്പര്യങ്ങളും സ്ത്രീയെയും പുരുഷനെയും പരസ്പരം അകറ്റാനും രണ്ടു തട്ടുകളിലായി പൂട്ടിയിടാനുമാണ് ശ്രമിച്ചത്. അതിന്റെ ഫലമാണ് ഇന്ന് വർദ്ധിച്ചു വരുന്ന ലൈംഗികാതിക്രമണ കേസുകൾ. അതായത്, പുരുഷൻ സ്ത്രീയിൽ നിന്ന് സാമൂഹികമായി അകലുംതോറും പുരുഷന്റെ എതിർലിംഗ താൽപര്യം അമർത്തി വെക്കപ്പെടുകയും ആ ഇച്ചാഭംഗത്തിന്റെ ഫലമായി അവനിൽ ഒരു തരം ഫ്രസ്ട്രേഷൻ ഉണ്ടാവുകയും ആ ഫ്രസ്ട്രേഷൻ അക്രമാസക്തമായ കാമാതുരത വളർത്തുകയും ചെയ്യുന്നുണ്ട്. അതാണ് പോക്സോ കേസുകൾ അടക്കമുളള പലതരത്തിലുള്ള പീഡന ശ്രമങ്ങളിലേക്കും പൊതുമധ്യത്തിലുള്ള തുറിച്ചു നോട്ടം, ഒളിഞ്ഞു നോട്ടം, സ്വയം ഭോഗം, തുണി പൊക്കിക്കാണിക്കൽ പോലുള്ള സ്ത്രീ വിരുദ്ധമായ പല അപമര്യാദകളിലേക്കും പുരുഷനെ നയിക്കുന്നത്. (എതിർലിംഗ താൽപര്യം എന്നാൽ കാമം മാത്രമല്ല ഉദ്ദേശ്യം, പരസ്പരം അറിയലൊക്കെ അതിന്റെ ഭാഗമാണ്) 2. ചെറുപ്പം മുതൽ കുട്ടികളെ ആൺ - പെൺ വേർതിരിവ് പഠിപ്പിക്കാതിരിക്കുക എന്നതാണ് ഏറ്റവും പ്രധാനമായ ആധുനിക പാഠം. കൗമാരം തൊട്ട് കുട്ടികൾക്കിടയിൽ തുടങ്ങുന്ന ആൺ - പെൺ വേർതിരിവും ആൺ - പെൺ തമ്മിലുള്ള അകൽച്ചയും ചേർന്ന് ആൺകുട്ടികളിൽ എതിർലിംഗ താൽപര്യത്തിന്റെ ഇച്ചാഭംഗം കുമിഞ്ഞുകൂടി മുകളിൽ പറഞ്ഞ ലൈംഗിക ഫ്രസ്ട്രേഷൻ രൂപപ്പെടുത്തുന്നുണ്ട്. ഈ ഫ്രസ്ട്രേഷനെ ലൈംഗിക ദാരിദ്ര്യം എന്നും പറയാം. ഇത്തരത്തിൽ ലൈംഗിക ദാരിദ്ര്യത്തോടെ വളരുന്ന കൗമാരക്കാർ ഒരു തരത്തിൽ പൊട്ടൻഷൽ റേപ്പിസ്റ്റുകളാണ്. നേരെ മറിച്ച് ആൺ പെൺ കുട്ടികൾ പരസ്പരം കൈപിടിച്ചും ചേർന്നിരുന്നും ജീവിക്കുമ്പോൾ പെൺകുട്ടികളിൽ നിന്ന് അകലം പാലിക്കാതെ മിംഗിളായി ജീവിക്കുന്ന ആൺകുട്ടികൾക്കിടയിൽ എതിർലിംഗ താൽപര്യം ഇച്ചാഭംഗമായി കുമിഞ്ഞു കൂടാതെ നിരന്തരം അയവു വരികയും കാമാതുരത അക്രമാസക്തതയിലേക്ക് നയിക്കുന്ന രോഗാതുരതയായി മാറാതിരിക്കുകയും ചെയ്യും. അതുകൊണ്ട് ആൺ പെൺ വേർതിരിവ് പാലിക്കാത്ത ജൻഡർ ന്യൂട്രൽ ജീവിത രീതി കുട്ടികളിൽ ശീലിപ്പിക്കുക എന്നതു മാത്രമാണ് ആധുനികമായ പരിഹാരം . ഇനി ചില നിർദ്ദേഷങ്ങൾ ; 1) കുടുംബത്തിൽ കൊണ്ടുവരേണ്ട മാറ്റങ്ങൾ ; 1. പെൺകുട്ടികളെയും ആൺകുട്ടികളെയും മാതാപിതാക്കൾ ഒരേ രീതിയിൽ വളർത്തുക. 2. പെൺകുട്ടികളെ വീടിനകത്തോ മുറ്റത്തോ കളിക്കാൻ കൽപിക്കുകയും ആൺകുട്ടികളെ പുറത്ത് മറ്റെവിടെയും കളിക്കാൻ അനുവദിക്കുകയും ചെയ്യുന്ന മനോഭാവം തിരുത്തുക. അവരെ ഒരു പോലെ പുറത്ത് വിടുക. അവർക്കിടയിൽ രൂപപ്പെട്ട നിഗൂഢതയുടെ മതിലുകളെ തകർക്കുക. 3. പെൺകുട്ടിയെ വീടിൻ്റെ അകത്തെ ജോലികൾ ഏൽപിക്കുകയും ആൺകുട്ടികളെ അങ്ങാടിയിൽ പോകുന്നത് പോലുള്ള വീടിനു വെളിയിലെ കാര്യങ്ങൾ ഏൽപിക്കുകയും ചെയ്യുന്ന രീതിയിൽ മാറ്റം വരുത്തുക. രണ്ടുപേരെയും രണ്ടു കാര്യങ്ങൾ ഒരു പോലെ ശീലിപ്പിക്കുക. 4. വീട് അടിച്ചുവാരാനും പാത്രം കഴുകാനും അലക്കാനും ആൺകുട്ടികളെയും പെൺകുട്ടികളെയും ഒരു പോലെ പ്രാപ്തരാക്കുക. അതിൽ ഒരു വിവേചനവും കാണിക്കാതിരിക്കുക. 5. വസ്ത്രധാരണയിൽ ഇഷ്ടമുള്ള വേഷം തെരഞ്ഞെടുക്കാനും ധരിക്കാനും ഒരുപോലെ സ്വാതന്ത്ര്യം നൽകുക. ആൺകുട്ടിക്ക് ട്രൗസർ ധരിക്കാമെങ്കിൽ പെൺകുട്ടിക്കുമാകാം. 6. പ്രാഥമികമായ ലൈംഗിക വിദ്യാഭ്യാസം നൽകാൻ മാതാപിതാക്കൾ ശ്രമിക്കുക ; 6 a ) കുട്ടികളെ അവരുടെ സ്വകാര്യ ഭാഗങ്ങൾ ഏതൊക്കെയാണെന്നും അവയുടെ പേരും ധർമവും എന്താണെന്നും അവയെ എങ്ങനെ സൂക്ഷിക്കണമെന്നും പഠിപ്പിക്കണം. 6 b ) ആർത്തവം, സ്വയംഭോഗം തുടങ്ങിയ കാര്യങ്ങൾ മനസിലാക്കിക്കൊടുക്കണം. 6 c ) കുട്ടികൾ ജനിക്കുന്നത് എങ്ങനെയാണെന്നും സ്ത്രീ പുരുഷ ലൈംഗിക ബന്ധത്തെ പറ്റിയും പഠിപ്പിക്കണം. 6 d ) ഒരാളുടെ ജൻഡർ (Gender) എന്താണെന്നും ലൈംഗിക താൽപര്യം, homosexuality, heterosexuality, bisexuality തുടങ്ങിയ കാര്യങ്ങളും പഠിപ്പിച്ചു കൊടുക്കണം. 6 e ) വിവാഹം എന്തിനാണെന്നും അത് ഇരുവരുടെയും താൽപര്യത്തിനൊത്ത് മാത്രമേ നടത്താവൂ എന്നും അതിനു മുമ്പ് സാമ്പത്തിക സ്വയംപര്യപ്തത രണ്ടു പേരും കൈവരിച്ചിരിക്കണമെന്നും വിവാഹം പരസ്പര താൽപര്യത്തിന് വിധേയമായ ഒരു താൽക്കാലിക ജീവിതം മാത്രമാണെന്നും പഠിപ്പിക്കുക. 6 f ) ആൺ പെൺ ഭേദമില്ലാതെ ഒരു പോലെ ഈ പറഞ്ഞ എല്ലാ കാര്യങ്ങളും മക്കളിൽ ബോധവൽക്കരിക്കാൻ മാതാപിതാക്കൾ ശ്രദ്ധിക്കുക. 7. കല്യാണം കഴിഞ്ഞാൽ സ്ത്രീ ഭർത്താവിൻ്റെ വീട്ടിൽ കഴിയണമെന്ന വ്യവസ്ഥ ഇല്ലാതാക്കുക. ഒന്നുകിൽ പുതിയതായി ഒരു വീട്ടിലേക്ക് വധൂവരന്മാർ മാറുക. അല്ലെങ്കിൽ സ്ത്രീക്ക് ഇഷ്ടമുള്ള വീട്ടിൽ കഴിയാവുന്ന വിധം വ്യവസ്ഥകൾ മാറ്റുക. ( അവൾ സാമ്പത്തികമായി സ്വയംപര്യപ്തയായാലേ ഇത് കൊണ്ടുവരാൻ സാധിക്കുള്ളൂ. അല്ലെങ്കിൽ അടിമത്തം തുടരേണ്ടി വരും. അതുകൊണ്ട് സാമ്പത്തിക സ്വയം പര്യപ്തത സ്ത്രീക്ക് അത്യാവശ്യമാണ്. ) ഇത്രകാര്യങ്ങൾ അടിസ്ഥാനപരമായി കുടുംബത്തിനകത്ത് കൊണ്ടുവരേണ്ട മാറ്റങ്ങളാണ്. 2) കുടുംബത്തിനു പുറത്ത് വിദ്യാഭ്യാസ സ്ഥാപനങ്ങളിൽ കൊണ്ടുവരേണ്ട മാറ്റങ്ങൾ ; 1. ഒന്നാം ക്ലാസ് മുതൽ ആൺകുട്ടികളെയും പെൺകുട്ടികളെയും ഒരുമിച്ച് ഇരുത്തുക. ഈയൊരു മിക്സ്ഡ് ( mixed ) രീതി മുതിർന്ന ക്ലാസുകൾ വരെ തുടരുക. വിദ്യാഭ്യാസ വകുപ്പ് ഇതൊരു നിയമമായി കൊണ്ടുവരിക. 2. സ്കൂൾ അസംബ്ലി പോലുള്ള ഇടങ്ങളിൽ പെൺകുട്ടികൾക്കും ആൺകുട്ടികൾക്കും വ്യത്യസ്ത വരികൾ ഒഴിവാക്കി ഇടകലർത്തി നിർത്തുക. 3. ജെൻഡർ ന്യൂട്രൽ യൂണിഫോം നടപ്പിലാക്കുക. 4. സ്കൂളുകളിൽ ലൈംഗിക വിദ്യാഭ്യാസം കൂടുതൽ ശാസ്ത്രീയ ഉള്ളടക്കത്തോടെ നൽകുക ; 4 a ) പ്രണയവും സ്നേഹവും ഒന്നല്ലെന്ന കാര്യവും പരസ്പര സമ്മതവും താൽപര്യവും മാത്രമേ ബന്ധങ്ങളെ നിലനിർത്താൻ പാടുള്ളൂ എന്നുമുള്ള അടിസ്ഥാന കാര്യങ്ങൾ പഠിപ്പിക്കുക. 4 b ) സാമ്പത്തിക സ്വയംപര്യപ്തത സ്ത്രീക്കും പുരുഷനും അനിവാര്യമാണെന്ന ബോധം നൽകുക. 4 c ) കല്യാണം എന്നത് താൽക്കാലിക ബന്ധം മാത്രമാണെന്നും ഒരാളുടെ ജീവിതം അയാളുടെ താൽപര്യത്തിന് അനുസരിച്ച് മാത്രമായിരിക്കണമെന്ന അവബോധം നൽകുക. 4 d ) പ്രസവം സ്ത്രീയുടെ ചോയിസാണെന്നും പ്രസവിക്കലല്ല കല്യാണത്തിൻ്റെ ലക്ഷ്യമെന്നും ഭ്രൂണനിരാസം നടത്താൻ ഓരോ സ്ത്രീക്കും അവകാശമുണ്ടെന്നും മനസിലാക്കുക. 4 e ) ക്വാണ്ടം അഥവാ ഗർഭനിരോധന മാർഗങ്ങളെ പറ്റിയും ഉപയോഗത്തെ പറ്റിയും സ്ത്രീക്കും പുരുഷനും അവബോധം ഉണ്ടാക്കുക. രണ്ടു പേരുടെ ഇഷ്ടങ്ങളും താൽപര്യങ്ങളും മാത്രമേ ലൈംഗിക ബന്ധത്തെ നിർണ്ണയിക്കാവൂ എന്ന അവബോധം നൽകുക. 4 f ) വിവാഹമോചനം എന്നത് ഒരാളുടെ വ്യക്തിസ്വാതന്ത്ര്യത്തിൻ്റെ ഭാഗമാണെന്ന തിരിച്ചറിവ് നൽകുക. 4 g ) കൂട്ടുകുടുംബമെന്ന പാരമ്പര്യവ്യവസ്ഥിതിയിൽ നിന്ന് അണുകുടുംബ രീതിയിലേക്കുള്ള മാറ്റത്തെ പ്രോത്സാഹിപ്പിക്കുക. 4 h ) ലൈംഗിക വിദ്യാഭ്യാസം നൽകുന്ന സിനിമകൾ, നാടകങ്ങൾ, വെബ് സീരീസുകൾ പരമാവധി പ്രയോജനപ്പെടുത്തുക. ഇത്തരത്തിൽ നിലവിലുള്ള സാമൂഹിക വ്യവസ്ഥിതിയെ ഉടച്ചുവാർക്കുന്ന രീതിയിൽ മാറ്റങ്ങൾ നടപ്പിലാക്കിയാൽ മാത്രമേ നമ്മുടെ സമൂഹം അകപ്പെട്ട പുരുഷമേധാവിത്ത വ്യവസ്ഥ തകരുകയുള്ളൂ...... സ്ത്രീയെ നിഗൂഢമായി കാണേണ്ടി വരുന്ന ലൈംഗികമായി മാത്രം ചിന്തിക്കേണ്ടി വരുന്ന പുരുഷ ബോധം ഇല്ലാതാവുകയുള്ളൂ...... സ്ത്രീയെ മറ്റൊരു വ്യക്തിയായി ഇതര സ്വത്വമായി കാണാനുള്ള സാമൂഹികബോധം പുരുഷനിൽ വളരുകയുള്ളൂ.......